Hitza

2012-2013 ikasturterako matrikulazioa hasiko da Loatzo musika eskolan

Tolosaldeko eta Leitzaldeko Hitza — Thu, 17 May 2012 22:48:15 +0000

Loatzo musika eskolan datorren ikasturteko matrikulazioarekin hasiko dira astelehenean. Adunan, musika eskolan egingo da, hilaren 22an goizez, eta hilaren 24an arratsaldez. Alegian, eskolan egin ahalko da hilaren 21ean arratsaldez, eta hilaren 22an, kultur etxean, goizez. Altzon, udaletxean izango da, hilaren 22an, goizez. Anoetan, musika eskolan egin ahalko da, hilaren 22an arratsaldez eta 23an goizez. Ibarrako musika eskolan hilaren 23an goizez eta 24an arratsaldez egingo da. Iruran, musika eskolan, hilaren 22an goizez eta 24an arratsaldez. Villabonako musika eskolan hilaren 22an goizez, eta 23an goizez eta arratsaldez. Eta, Zizurkilen, Otaño ikastetxean hilaren 21ean arratsaldez, eta Atxulondon, hilaren 23an goizez.

Hirigintza batzarra, datorren astelehenean

Alegialdeko Hitza — Thu, 17 May 2012 22:46:50 +0000

Hirigintza eta ingurumen batzordeen bilera egingo dute astelehenean, hilaren 21ean, 20:30ean, udaletxeko batzar aretoan. Herritarrei irekia izango da batzarra.

Zabalik da Kutxak antolatutako udako ekimenetarako izen ematea

Maitane Aldanondo — Thu, 17 May 2012 22:20:24 +0000

Gaztetxoen Elkarteak, Eureka! museoak eta Ekoguneak 3 eta 18 urte artekoentzat jarduerak prestatu dituzte.

Axier Munian surflaria, Kutxako arduradunekin batera.(Argazkia: Maitane Aldanondo)

Udalekuak, auzolandegiak, lantegiak… Kutxa Fundazioak udarako prestatutako jardueretan izena emateko epea abian da. Aisialdi ludikoa eta kulturala sustatzeko helburuz prestatu dituzten egitasmoen zerrenda atzo aurkeztu zuten Kutxa, Eureka! zientzia museoa eta Ekoguneko arduradunek. Guztira, 3 eta 18 urte arteko 35.000 lagunek izango dute parte hartzeko aukera.
Gaztetxoen elkarteko eskaintza anitza da. Haur asko erakartzen duen Donostia ezagutuz ekimena euskaraz, gazteleraz nahiz ingelesez egiteko aukera izango dute 3 eta 12 urtekoek. Berritasun gisa, programan parte hartzen dutenek Axier Munian surflariaren Free Surfing eskolarekin elkarlanean, surfa eta honen inguruko filosofia ezagutzeko aukera izango dute. “Ingurumenarekiko eta hurkoarekiko errespetua landuko dugu”, adierazi zuen Munianek. Gurasoen eskaerari erantzunez, haurrek, hamabost egunez parte hartu ahal izango dute ekimenean.
Hiriko txokoak deskubritzeaz gain, Antzerkia euskaraz eta Arkitektura lantegia programak ere abian jarri dituzte. 12 eta 15 urte artekoentzat, aldiz, zineman, argazkilaritzan edo ur kiroletan murgiltzeko lantegiak egingo dituzte.
Zientziaren misterioak era ludiko eta didaktikoan ezagutu nahi dituzten 3 eta 10 urteko haurrek, Eureka! Zientzia museoan dute euren txokoa. Ekaina eta iraila bitartean, 1.700 haurrek izango dute udaleku irekien parte izateko parada. Horretarako hamaika txanda antolatu dituzte, gehienak euskaraz, goizez edo arratsaldez. Bestelako udalekuek ere ez dute hutsik egingo. Kutxabanken sorrera dela eta, gainera, Arotz Eneara, Briñasera (Errioxa) edo Sukarrietara (Bizkaia) joan erabaki beharko dute gaztetxoek.
Kutxa Ekoguneak 15 eta 18 urte arteko nerabeak kontuan hartu ditu bere eskaintza osatzean. Natura ingurunearen eta kultura-ondarearen babesa eta berreskuratzea lantzeko bi auzolandegi prestatu dituzte. Bata Ekainen, Lili burdinola berreskuratzeko; bestea Eskoriatzan, Iburuz erronkaren ingurumena berreskuratzeko. Parte hartzeak 175 euroko kostua du, eta bakoitzean, 22 lagunentzako tokia izango da.
Informazio gehiagorako edo izena emateko Kutxasocial.net webgunera jo.

Tomax izango da Hiporen sendagilea ‘Papo pupa’ ikuskizunean

Estitxu Zabala — Thu, 17 May 2012 22:08:50 +0000

Pailazo gipuzkoarrek igande arratsaldean estreinatuko dute euren lan berria, Antzoki Zaharrean

Hipo eta Tomax pailazoak. (Argazkia: Estitxu Zabala)

Hipo eta Tomax pailazoek euren ikuskizun berria estreinatuko dute etzi, igandean, Antzoki Zaharrean: Papo pupa. Ikuskizunak ordubete iraungo du, eta lau urtetik gorako haurrei zuzendua dago. Dagoeneko sarrerak salgai daude, 4’5 eurotan; eta pailazoak antzokia betetzeko prest daude.

Papo pupa ikuskizunean, Hipok istripua izango du bizikletan dabilela, semaforoari kasurik ez egiteagatik. Bere lagun Tomaxek semaforoaren funtzionamendua azalduko dio, bere erara, eta ondoren, ospitalera eramango du. Ospitalean Patxi Xiringa medikua ez dagoenez, Tomax izango da Hiporen medikua, eta bera sendatzen saiatuko da. Ikuskizuna musikaz, umorez, jolasez eta majiaz betea egongo da.

Bosgarren lana
Hipo eta Tomax pailazoak, Mikel Sarriegi (Hondarribia, 1968) eta Joserra Fachado (Pasaia San Pedro, 1960) aktoreak dira. Hipo eta Tomax taldea 2008an jaio zen, eta ordutik, bost ikuskizun egin ditu: Papo pupa, Beldurraren etxean, Dinbi danba, Herri kirolak eta Sukaldean. Azken batean, familia giroan guztiek ongi pasatzea dute helburu, eta irribarreak lortzen jarraitzeko asmoa dute.

Hipo eta Tomax: Ikuskizunen egutegia

Maiatzak 20, igandea. Donostiako Antzoki Zaharrean, 17:30ean, Papo pupa. Sarrerak, 4’5 euro.
Ekainak 8. Urruñan, Beldurraren etxean.
Ekainak 9. Hernaniko Elizatxo ikastolan, Papo Pupa.
Ekainak 16. Urnietan, Papo pupa.
Ekainak 22. Bermeon, Dinbi danba.
Ekainak 23. Elorrion, Beldurraren etxean.
Ekainak 24. Hernanin, Dinbi danba.
Ekainak 25. Irunen, Dinbi danba.
Ekainak 28. Usurbilen, Papo pupa.
Uztailak 5. Loiolan, Papo pupa.
Uztailak 9. Gasteizen, Papo pupa.

Valentzia Lagun Aro baino gehiago izan da (82-60)

Aritz Sorzabal — Thu, 17 May 2012 20:11:46 +0000

ACB Ligako play-offak abian jarri dira ostegunaren etorrerarekin. Lagun Aro Gipuzkoa Basketek Valentzian jokatu du, eta porrota jaso du final-laurdenetako kanporaketako lehen lehian (82-60).

Hirugarren laurdenean puskatu da norgehiagoka, 66-47koarekin amaitu baita. De Colo eta Caner-Medley amesgaizto ziren ordurako, 24 eta 18 punturekin, hurrenez hurren. Frantziarrak 26 punturekin bukatu du partida, eta 29 puntuko balorazioarekin. 22-10eko partziala jaso du Gipuzkoa Basketek aldageletatik bueltan, eta norgehiagoka erabakita geratu da, laugarren eta azken laurdenari itxaron gabe.

Atsedenaldira atzetik iritsi dira donostiarrak (44-37). Baronen puntuak faltan bota dituzte, nahiz eta, ohi bezala, Pankok eta Vidalek lan txukuna egin duten aldagelara joan aurretik; 26 puntu elkarren artean, baina denak lehen bi laurdenetan. Izan ere, gero itzali egin dira.

Lehen laurdena, 26-22 markagailuarekin amaitu da. Partida hasiera kaskarra egin dute Sito Alonsoren jokalariek (18-9), baina piskanaka-piskanaka partidan sartzen joan dira, markagailuan hurbildu arte. Atsedenaldia iritsi aurretik, baina, aldea hartzen utzi diete etxekoei; eta hirugarren laurdenean, alde hori handitu da, erabakigarria izan arte.

Bere historian lehen aldiz sailkatu da Gipuzkoa Basket titulurako kanporaketetarako. Final-laurdenetan, Valentzia Basket egokitu zaio, eta finalerdietara igarotzeko La Fontetan irabazi beharko du derrigorrez, kantxa abantaila kontra baitauka. Hots, hirugarren partida jokatuz gero –bi norgehiagoka irabazten dituen taldea sailkatuko da–, Valentzian izango litzateke. Igandean, bigarren partida jokatuko dute Illunben, 12:30ean. Partida hori irabazi beharko dute, hirugarren partida erabakigarria jokatu ahal izateko.

Valentzia-Lagun Aro: 66-47, hirugarren laurdena amaituta

Irutxuloko Hitza — Thu, 17 May 2012 19:48:41 +0000

ACB Ligako play-offak abian dira. Lagun Aro Gipuzkoa Basket Valentzian ari da jokatzen, eta momentuz, hirugarren laurdenean 66-47 ari da galtzen. Lehia zati honetan puskatu da, De Colo eta Caner-Medleyren lan bikainari esker; 24 eta 18 puntu, hurrenez hurren. 22-10eko partziala jaso du Gipuzkoa Basketek aldageletatik bueltan, eta norgehiagoka ia erabakita geratu da.

Atsedenaldira atzetik iritsi dira donostiarrak (44-37). Baronen puntuak faltan botatzen ari dira, nahiz eta, ohi bezala, Pankok eta Vidalek lan txukuna egin duten orain arte; 26 puntu elkarren artean.

Lehen laurdena, 26-22 markagailuarekin amaitu da. Etxekoen artean, De Coloren eta Caner-Medleyren lana jada nabarmentzekoa zen. Partida hasiera kaskarra egin dute Sito Alonsoren jokalariek (18-9), baina piskanaka-piskanaka partidan sartzen joan dira, markagailuan hurbildu arte.

Lehen laurdenean galtzen ari da Lagun Aro (18-9)

Irutxuloko Hitza — Thu, 17 May 2012 18:44:27 +0000

ACB Ligako play-offak abian dira. Lagun Aro Gipuzkoa Basket Valentzian ari da jokatzen, eta momentuz, zazpigarren minutuan, galtzen ari da. Ez da hasiera erraza izaten ari (18-9).

Bere historian lehen aldiz sailkatu da Gipuzkoa Basket titulurako kanporaketetarako. Final-laurdenetan, Valentzia Basket egokitu zaio, eta finalerdietara igarotzeko La Fontetan irabazi beharko du derrigorrez, kantxa abantaila kontra baitauka. Hots, hirugarren partida jokatuz gero –bi norgehiagoka lehenago irabazten dituen taldea sailkatuko da–, Valentzian izango litzateke. Igandean, bigarren partida Illunben jokatuko dute, 12:30ean.

Ikasleen ekarpena agenda 21 ekimenari

Tolosaldeko eta Leitzaldeko Hitza — Thu, 17 May 2012 18:23:45 +0000

Eskola agenda 21 egitasmoan ikasturte honetan biodibertsitatea lantzen ari dira eskualdeko eskoletan. Hala, ikasleek egindako lana, hartutako konpromisoak eta udal agintariei egindako proposamenak aurkezten ari dira egun hauetan hainbat herritan. Esaterako, astelehenean Alegian egin zuten aurkezpena eta atzo, Tolosan izan ziren ikasleak.

Museoak, merkataritza eta kultur aniztasuna bat eginik, asteburuan

Tolosaldeko eta Leitzaldeko Hitza — Thu, 17 May 2012 17:41:49 +0000

Museoen Nazioarteko Eguna ostiralean ospatzen dela baliatuz, hainbat eragilek bat egin dute egun horretan eta larunbatean hainbat ekitaldi antolatzeko eskualdeko lau herritan. Atzo aurkeztu zuten ekimena Topic museoak, Gorrotxategi museoak,
Mariren Zuhaiztia abentura parkeak, eta Tolosaldea Garatzeneko turismo, merkataritza eta migrazio sailek, Ibarrako eta Villabonako merkatari elkarteekin batera.
Antolatzaileek ekitaldiak antolatzeko izan den elkarlana eta kooperazioa nabarmendu zuten. Iaz, Turismo mahaiak bultzatuta, Museoen Nazioarteko Egunean ate irekien jardunaldian egin zuten. «Arrakastatsua izan zen», azaldu zuten antolatzaileek, eta ekimen horri Gau Zuria ospatzearena elkartu zaio aurtengoan. Hala, Topic museoan, Gorrotxategi Museoa dagoen Letxuga kalean eta Mariren Zuhaiztian musika izango da ostiral gauean. Bestalde, Topic-eko Ambigu tabernan edari bat hartzeko baleak banatuko dituzte Botarri jatetxeak, Illargi tabernak, Fronton jatetxeak eta Solana 4 tabernak.
Aurreko ekimenei beste batzuk ere lotu zaizkie. Turismo bulegoak, esaterako, Tolosako Alde Zaharra eta Santa Maria parrokia zuziekin bisitatzeko aukera emango du. Bere aldetik, migrazio sailak antolatuta, Euskal Herria plazan hainbat taldek parte hartuko dute: Guardabarranco dantza taldea Nikaraguatik, Flor de Jara abesbatza Extremaduratik, Ibarrako Alurr dantza taldea, Errumaniako musikariak, Mundialak Gara Euskal Herriko etorkinen euskarazko taldea eta DOMAnDOMAn Senegalgo perkusio taldea. Izan ere, astelehenean, hilak 21, Kultur Aniztasunaren Nazioarteko Eguna da.
Larunbatean merkataritza izango da protagonista. Ibarran zein Villabonan komertzioek kalera aterako dituzte euren produktuak, musikariek jarriko dute giroa, eta tabernek ere parte hartuko dute pintxo poteoarekin.
Ekitaldien berri ematen duen kartela Urnietako Salesiarrak ikastetxeko ikasleek egindakoa da, eta eurek egin dute diptikoa ere. Topic zentroko Mariona maskotan oinarritu dira kartela egiteko, eta antolatzaileen zorionak jaso dituzte egindako lanagatik.
Horrez gain, Topic zentroak argazki lehiaketa antolatu du. Adinaren arabera hiru talde egin dituzte eta ostiralean bertan Topic zentroan ateratako argazkiak aurkeztu behar dira lehiaketara.

EGITARAUA
Maiatzak 18, ostirala
TOLOSA
11:00-13:00 eta 16:00-20:00. Topic zentroan ate irekiak eta argazki lehiaketa.
10:00etan eta 18:00etan. Gorrotxategi museoan bisita gidatua eta txokolate dastatzea doan.
20:00-23:00. Letxuga kalean, Gorrotxategiko txokolate txuriaren dastatzea eta musika emanaldia.
20:00-21:00. Euskal Herria plazan, Tolosaldeko musika eta dantza anitzak.
21:00-01:00. Topic zentroan, musika emanaldiak eta Ambigu taberna irekita.
22:30-00:00. Bisita gidatua zuziekin: Santa Maria parrokia eta Alde Zaharra.
ABALTZISKETA
22:00-00:00. Larraitzeko Mariren Zuhaiztia argiztatuta eta irekita, eta trikitilariek girotua.

Maiatzak 19, larunbata
IBARRA
10:30-14:30. Merkatariak kalean.
11:30-12:30. Dultzaineroen kalejira.
12:00-15:00. Pintxo Potea.
12:30-13:30. Senegalgo musika eta dantzak.

VILLABONA
11:00-14:00. Merkatariak kalean.
11:30-14:30. Musika emanaldiak.
12:00-15:00. Pintxo Potea.

Gutuna: Etorkizuna eta erantzukizuna

Tolosako Hitza — Thu, 17 May 2012 17:37:15 +0000

Hiru eguneko tartean jakin dugu, batetik, Europako Parlamentua «zabortegiak eta erraustegiak kentzearen alde» dagoela (http://www.gipuzkoazz.com/zerozabor/?p=3150) eta, bestetik, Ingurumen Ministerioaren iritziz «eredugarria» dela Usurbilgo «atez atekoa» (http://www.gipuzkoazz.com/zerozabor/?p=3104). Halere, XXI. mendean sartuta gauden honetan, EAJk jarrera atzerakoia erakusten du, osasunarekin eta ingurumenarekin solidarioa eta aurrerakoia den ikuspuntutik. EAJk ondo asko badaki, hondakin gutxiago sortzeko politika aktiboak aurrera eramateaz gainera, bi aukera besterik ez daudela: edo arduraz jokatu eta planteatu hondakinak nahitaez gaika sailkatu, bildu eta tratatu behar direla; edo hondakinak bere horretan erraustegira eraman, horrek gure osasunari eta ingurumenari eragin diezaiekeen kaltearekin. Pentsatzen dugu ia inork ez daukala zalantzarik aukera onena zein den. Beraz, hau da kontua: hondakinak gaika sailkatu egin behar direla berrerabiltzeko, birziklatzeko eta merkatu balio bat emateko lehengai bezala; eta ez, aldiz, kudeatu zabortegi batean edo erraustegi batean ezabatu behar den zabor gisara.
Gainera, edozein gizarte modernotan, hondakinen gaikako bilketa gora doan balore bat da. Gure seme-alaben ikastetxeek beren hezkuntza curriculumetan eta programetan garrantzia handia ematen diete kontsumo arduratsuari eta hondakinak birziklatze eta berrerabiltzeari. Hori bada gure gazteentzat nahi dugun heziketa, ezin da ulertu nola politikari batzuek defendatzen dituzten balore horien kontrako politikak. Ezin da ulertu nola EAJk segitzen dituen babesten sufritzen ari garen krisi ekonomiko basati honetara eraman gaituzten politikak.
Kontsultarekin demagogia egitea erraza da, baina EAJren aldetik etorrita, ez da batere sinesgarria. EAJk kontsultatu al du erraustegiaren gainean? Kutsatzen jarraitzeko aukera ezin zaio eman inori, zergak ez ordaintzeko aukera ematen ez zaion bezalaxe. Hori badaki EAJk, baina zaborren aitzakiarekin zalantzan jarri nahi du udal ordezkarien gehiengoak aurrera eraman nahi dituen eztabaida lasaia eta gizarte mailako elkar aditzea. Gehi-engo sozial, politiko eta sindikalak exijitzen digun aldaketa gestionatzeko aukera eta erantzukizuna dauzkagu. Eta ez dugu etsiko. Ezker Abertzaleak islatzen duen gaitasun politiko eta soziala erabat konprometituta dago aldaketa horrekin. Hamaika arrazoi baditugu esateko bide onetik goazela.
Silvana Ostiza, Koldo Maiz eta beste 31 sinatzaile. Tolosa.